रंगखबर, काठमाडौँ : सुदर्शन थापा प्रोडक्शनको ब्यानरमा निर्माण भएको फिल्म ‘म यस्तो गीत गाउँछु २’ को अफिसियल ट्रेलर सार्वजनिक भएको छ । करिब ३ मिनेट १० सकेन्ड लामो ट्रेलरमा मुख्य पात्र पल र पूजा हावी भएका छन। म्युजिकल लभ स्टोरी फिल्ममा पल र पूजा दुवैलाई कलाकारको रुपमा देखाउन खोजिएको छ। सुदर्शन थापाले निर्देशन गरेको फिल्ममा सुदर्शन थापा र पूजा शर्मा निर्माताका रुपमा रहेका छन् भने जन्मजय साम्पाङ राई सह–निर्माता रहेका छन् । शिवम अधिकारीको लेखन रहेको फिल्ममा सौरभ लामाको छायांकन रहेको छ।
फिल्ममा पुजा र पलका साथमा दिनेश डीसी, हरिहर शर्मा लगायतका कलाकारहरुको पनि अभिनय रहेको छ ।यस अघि फागुन २३ गतेलाई रिलिज मिति तय गरिएको फिल्म अब भने फागुन ३० गतेबाट अल नेपाल रिलिज हुनेछ। पुर्व निर्धारित मितिमा बलिउड फिल्म बाघी ३ आउँने भएपछि ‘म यस्तो गीत गाउँछु २’ ले आफ्नो पर्दर्शन मिति सार्नु परेको हो।