रंग खबर, काठमाण्डौं । निर्देशक बसन्त निरौलाको निर्देशनमा फिल्म ‘होलिडे’ निर्माण हुने भएको छ । आफ्नो जन्मदिनको अवसर पारेर निर्देशक निरौलाले मंगलबार फिल्मको घोषणा गर्दै गीत रेकर्ड गराए ।
गायक तथा संगीतकार टंक बुढाथोकीले संचालनमा ल्याएको रेकर्डिङ स्टुडियो ‘स्टुडियो नाइन’ को उद्घाटन नै उक्त फिल्मको गीत रेकर्डिङबाट शुरु भएको थियो ।‘शनिबारको छुट्टीमा मेहेनत गरेर’ बोलको उक्त गीतमा टंक स्वयम र गायिका मनिषा पोखरेलले स्वर दिएका छन् । संगीत पनि टंककै रहेको छ ।
निर्देशक निरौलाको जन्मदिनसँगै स्टुडियो उद्घानको खुसियाली साट्न बरिष्ठ कलाकर रमेश बुढाथोकी, नायक आर्यन सिग्देल, नायिका सञ्चिता लुईंटेल, पबित्रा आचार्य, नायक सोहित मानन्धर लगायतका फिल्मकर्मी सहभागी थिए ।
कलाकार फाईनल भईनसकेको ‘होलिडे’ को छायाँकन युरोपमा गरिने निर्देशक निरौलाले बताए ।‘फिल्ममा पुर्णतया एक्सन हुनेछ’, उनले भने । ‘
डाक्टर बनाउने पैसाले स्टुडियो खोले : टंक बुढाथोकी
मेरो बुबा–आमाको सानैदेखिको सपना थियो, ‘मलाई साइन्स पढाएर डाक्टर बनाउने ।’ प्लस टुमा त साइन्स नै पढे । तर मेरो रुची संगीतमा थियो । त्यहीभएर बुबा–आमाको डाक्टर बनाउने सपनालाई लत्याएर संगीतमा आए । विगत ९ वर्षदेखि म संगीतमा संघर्षरत छु । त्यहीभएर स्टुडियोको नाम पनि ‘स्टुडियो नाइन’ राखेको हुँ । मैले आफै कमाएको रकमले स्टुडियो खोलेको होइन् । मलाई डाक्टर बनाउन जुन रकम खर्च हुन्थ्यो त्यही रकम स्टुडियो संचालनका लागि खर्च गरिदिनुस् भनेर बुबा–आमालाई गरेको आग्रह अनुसार आज यो स्टुडियो संचालनमा आएको हो । अब संगीत भर्नेदेखि रेकर्डिङसम्मको काम एकैठाउँमा हुनेभएपछि निर्माताहरुलाई पनि सहज हुने अपेक्षा राखेको छु ।
