डि सिने अवार्डमा ‘नोभेम्बर रेन’को वर्चश्व|अभिनयमा आर्यन र नम्रता उत्कृष्ट(फोटोफिचर)

रंग खबर, काठमाण्डौँ । सोमबार साँझ राजधानीमा सम्पन्न सातौं डि सिने अवार्डमा फिल्म ‘नोभेम्बर रेन’ले सर्वाधिक आठ विधामा अवार्ड जितेको छ । अवार्डमा यही फिल्म उत्कृष्ट घोषित भयो ।
यही फिल्मबाट अभिनेता आर्यन सिग्देल र अभिनेत्री नम्रता श्रेष्ठ उत्कृष्ट अभिनेता र अभिनेत्रीको अवार्ड हात पारे । दिनेश राउतले ’नोभेम्बर रेन’बाट नै उत्कृष्ट निर्देशकको अवार्ड उचाले भने छुल्ठिम गुरुङ्ग उत्कृष्ट सह–अभिनेत्री बन्न सफल रहिन् । युवराज चौलागाईंले सोही फिल्मको गीतबाट उत्कृष्ट पाश्र्व गायकको अवार्ड पाए भने सामिप्य राज तिमल्सिनाले उत्कृष्ट संवादको उपाधी जिते । त्यसैगरी राजेश श्रेष्ठले ’नोभेम्वर रेन’बाटै छाँयाकारको अवार्ड थापेका थिएँ ।
कुल २१ विधामा वितरण गरिएको यो अवार्डका लागि गतवर्षका ७० भन्दा बढी फिल्महरु प्रतिष्पर्धामा उत्रेका थिए । थुप्रै अवार्ड हात परिसकेको फिल्म ‘कबड्डी’का निर्देशक रामबाबु गुरुङले क्रिटिक्सका नजरमा उत्कृष्ट निर्देशक ठहरिए । यसैगरी रामबाबु र उपेन्द्र सुब्बाले यही फिल्मबाट उत्कृष्ट पटकथाको अवार्ड पनि पाए । निर्दे्शित प्रतिष्पर्धात्मक विधामा पछाडी परे पनि ‘कबड्डी’ क्रिटिक्सको नजरमा उत्कृष्ट देखियो । अभिनेता दयाहाङ राई क्रिटिक्सको नजरमा उत्कृष्ट अभिनेता घोषित भए । फिल्म ‘सुन्तली’बाट प्रियंका कार्कीले पनि अभिनेत्रीका रुपमा क्रिटिक्स अवार्ड हात पारिन् । क्रिटिक्सकै नजरमा फिल्म ‘सुनपानी’लाई विशेष चलचित्र घोषणा गरियो भने ’कोहिनुर’लाई पब्लिक च्वाइस अवार्ड प्रदान गरियो । कार्यक्रममा फिल्म ’भीमदत्त’लाई पनि जूरी अवार्डले सम्मान गरियो ।
यसैगरी सोही कार्यक्रममा २५ वर्षदेखि नेपाली फिल्म क्षेत्रमा क्रियाशिल दुई फिल्मकर्मी र एक रंगपत्रकारलाई समेत सम्मान गरिएको थियो । अभिनेत्री गौरी मल्ल र निर्माता गोपाल कायस्थलाई रजत सम्मान प्रदान गरिएको थियो भने रंग पत्रकार डब्बु क्षेत्रीलाई चलचित्र पत्रकारिता पुरस्कारले सम्मान गरिएको थियो । विश्वकै कान्छा फिल्म निर्देशकको किर्तिमान राखेका निर्देशक सौगात विष्टलाई पनि सोही कार्यक्रममा सम्मान गरिएको थियो ।